Çeku: Jemi gati për ‘Eurovision’, e kemi dhënë provimin

21:58 | 26 Tetor 2024
R J

Ministri i Kulturës, Hajrulla Çeku, në prag të nisjes së natës finale të edicionit të dytë të Festivalit të Këngës, ka thënë se në aspektin organizativ dhe cilësor, Kosova është gati për pjesëmarrje në garën evropiane të këndimit, “Eurovision”.

“Besoj që tashmë me edicionin e dytë kemi dhënë dëshminë e qartë që ne jemi gati edhe në aspektin organizativ, cilësor dhe të tjera. Mbesin vetëm aspekte procedurale për çështjen e anëtarësimit dhe përfaqësimit në ‘Eurovision”, ka thënë Çeku nga tapeti i kuq.

Ai ka veçuar sidomos edicionin e dytë, si dëshmi për hapa të mëtutjeshëm drejt garës evropiane.

“Teknikisht, organizativisht, plotësojmë të gjitha kushtet. Mbesin vetëm aspekte procedurale drejt çështjes së anëtarësimit dhe përfaqësimit në ‘Eurovision’. Politikisht duhet të bëjmë shumë, por ta kemi parasysh që vitin e kaluar kemi qenë të monitoruar nga EBU sepse ata vlerësojnë çështjet organizative. Ne e kemi dhënë këtë provim, tash ballë lartë vazhdojmë drejt ‘Eurovisionit”, ka thënë ai për RTK-në.

Tutje ai ka vlerësuar se sivjet ka qenë edicion edhe më i suksesshëm, teksa ka thënë se ky është hap i madh jo veç për skenën muzikore të Kosovës por edhe më gjerë.